அஸெரி-ஆர்மீனிய போரில் ரஷ்ய தரகு போர் நிறுத்தம் முறிந்துபோகிறது

Alex Lantier
14 October 2020

மொழிபெயர்ப்பின் மூலக் கட்டுரையை இங்கே காணலாம்

அஜர்பைஜானுக்கும் ஆர்மீனியாவிற்கும் இடையிலான இரண்டு வார கால போரில் ரஷ்ய அதிபர் விளாடிமிர் புட்டினின் ஒரு தற்காலிக போர் நிறுத்த உடன்பாட்டு முயற்சியானது வார இறுதியில் தோல்வியடைந்தது. மாஸ்கோவில் அஸெரி மற்றும் ஆர்மீனிய தூதர்கள் எட்டிய ஒப்பந்தம் நடைமுறைக்கு வரவிருந்த ஐந்து நிமிடங்களுக்குப் பின்னர் காக்கசஸில் இரண்டு முன்னாள் சோவியத் குடியரசுகளுக்கு இடையே சண்டை வெடித்தது. இருதரப்பும் பொதுமக்கள் இலக்குகளின் மீது குண்டுவீசியதுடன், மேலும் போர்முனை நெடுகிலும் மற்றும் சர்ச்சைக்குரிய நாகோர்னோ-கராபாக் பிராந்தியத்திலும் இரத்தக்களரிகள் அனைத்தும் தொடர்ந்து பெருகிவருகின்றன.

அஸெரி மற்றும் ஆர்மீனிய வெளியுறவு அமைச்சகங்களின் பிரதிநிதிகளை அக்டோபர் 9 ம் திகதி மாஸ்கோவிற்கு கிரெம்ளின் அழைத்து அறிவித்தது: “ரஷ்யாவின் ஜனாதிபதி இறந்தவர்களின் உடல்களையும் கைதிகளையும் பரிமாறிக் கொள்வதற்காக மனிதாபிமான அடிப்படையில் நாகோர்னோ-கராபாக்கில் நடந்த சண்டையை நிறுத்த அழைப்பு விடுத்துள்ளார்.” ஆர்மீனியாவை தீவிரமாக ஆதரித்த பிரெஞ்சு ஜனாதிபதி இமானுவேல் மக்ரோனும் போர் நிறுத்தத்திற்கு அழைப்பு விடுத்தார்.

ஆர்மீனிய அதிகாரிகள் பேச்சுவார்த்தைக்குச் சென்றனர், இருப்பினும் போர் நிறுத்தத்திற்கு முதலில் ஒப்புக்கொண்டால் மட்டுமே அவர்கள் பேச்சுவார்த்தையில் கலந்து கொள்வார்கள் என்ற அவர்களின் நிலைப்பாட்டை மாற்றியமைத்தனர். ஆனால், மாஸ்கோவில் பேச்சுவார்த்தை தொடங்குவதற்கு சற்று முன்னர், அஜர்பைஜான் மற்றும் அதனுடைய முக்கிய பிராந்திய ஆதரவாளரான துருக்கி ஆகிய இரு நாடுகளின் அதிகாரிகள் எந்த சமரசமும் செய்ய மாட்டார்கள் என்று கூறினார்கள்.

In this image taken from footage released by Azerbaijan's Defense Ministry on Sunday, Sept. 27, 2020, Azerbaijan's soldiers fire from a mortar at the contact line of the self-proclaimed Republic of Nagorno-Karabakh, Azerbaijan. (Azerbaijan's Defense Ministry via AP)

மாஸ்கோ பேச்சுவார்த்தைகள் தோல்வியில் முடிவடையும் என்று துருக்கிய ஜனாதிபதி செய்தித் தொடர்பாளர் இப்ராஹிம் கலின் வெளிப்படையாகக் முன்கணித்தார். "அவர்கள் போர் நிறுத்தத்திற்கு மட்டும் அழைப்பு விடுத்தால், அவர்கள் போர் நிறுத்தத்தை நோக்கி மட்டுமே வேலை செய்கிறார்கள் என்றால், அது கடந்த 30 ஆண்டுகளாக நடந்ததை மீண்டும் மீண்டும் செய்வதைத் தவிர வேறொன்றும் இல்லை," என்று அவர் கூறினார். ஆர்மீனியா சட்டவிரோதமாக கராபாக் பகுதியை ஆக்கிரமித்துள்ளது என்ற துருக்கிய அரசாங்கத்தின் நிலைப்பாட்டை மீண்டும் கூறிய கலின், "ஆக்கிரமிப்பை முடிவுக்கு கொண்டு வர ஒரு விரிவான திட்டத்தையும் இதில் சேர்க்காவிட்டால், அது தோல்வியடையும் என்பது கிட்டத்தட்ட நிச்சயமாக இருக்கும்", என்று சேர்த்துக் கொண்டார்.

அஸெரி ஜனாதிபதி இல்ஹாம் அலியேவ், ஆர்மீனியாவிற்கு எந்த சலுகையும் கொடுக்கமாட்டேன் என்று வலியுறுத்தி, தேசத்திற்கு தொலைக்காட்சியில் உரையாற்றினார். "அஜர்பைஜான் பலத்தை பயன்படுத்தியமை தரையிலுள்ள நிலைமைகளை மாற்றியது" என்று அலியேவ் கூறினார். மேலும் "இந்த சர்ச்சைக்கு ஒரு இராணுவ தீர்வு உள்ளது என்பதை அது நிரூபித்துள்ளது" என்று ராய்ட்டர்ஸ் செய்தி வெளியிட்டுள்ளது. இந்த பேச்சுவார்த்தைகள் மோதலை அமைதியாக தீர்க்க ஆர்மீனியாவின் "கடைசி வாய்ப்பு" என்று அவர் மேலும் கூறினார்.

கராபாக்கில் ஹட்ருத், சாய்லி, யுகாரி குஸ்லாக், கோராசில்லி, கிஷ்லாக், கராஜள்ளி, அஃபாண்டிலர், சுலேமான்லி மற்றும் சுர் ஆகிய சமூகங்களை அஸெரி படைகள் கைப்பற்றியுள்ளன, இது ஒரு "வரலாற்று வெற்றி" என்று மேலும் அலியேவ் கூறினார். அஜர்பைஜானில் ஆர்மீனிய கட்டுப்பாட்டிலுள்ள புசுலி மாகாணமும் சுற்றிவழைக்கப்பட்டிருப்பதாகவும், அஸெரி படைகள் ஆர்மீனியர்கள் தப்பித்து வெளியேற ஒரு சிறிய தப்பிக்கும் பாதையை விட்டுச் சென்றதாகவும் அவர் தெரிவித்தார்.

சனிக்கிழமை நண்பகலுக்கு ஒரு போர் நிறுத்தம் சிறிது நேரம் அறிவிக்கப்பட்ட பின்னர், உடனே இரு தரப்பிலும் சண்டை மீண்டும் வெடித்தது. ஆர்மீனிய அதிகாரிகள் அஸெரி துருப்புக்களை மதியம் 12:05 மணிக்கு தாக்குதல் நடத்தியதாக குற்றம் சாட்டினர், அதே நேரத்தில் ஆர்மீனியா பொதுமக்கள் இலக்குகள் மீது குண்டுத் தாக்குதல் நடத்தியதாக அஸெரி அதிகாரிகள் குற்றம் சாட்டினர். அஸெரி நகரமான பார்தாவையும், நாகோர்னோ-கராபாக்கில் ஆர்மீனியாவின் கட்டுப்பாட்டிலுள்ள ஸ்டீபனகெர்ட்டையும் குறிவைத்து பீரங்கித் தாக்குதல்களை நடத்தியதாக AFP அறிக்கை வெளியிட்ட நிலையில் ஞாயிற்றுக்கிழமை சண்டை தீவிரமடைந்தது. ஒரு ஆர்மீனிய ஏவுகணை அஜர்பைஜானின் இரண்டாவது பெரிய நகரமான கஞ்சாவையும் தாக்கியது, அது ஒன்பது பேரைக் கொன்று மற்றும் 34 பேர் அதில் காயமடைந்தனர்.

திங்களன்று, அஸெரி மற்றும் ஆர்மீனிய படைகள் போர் நிறுத்த மீறல் குற்றச்சாட்டுகளை வியாபாரம் செய்தன, அதே நேரம் இரு தரப்பும் அதை மதிப்பதாக கூறினார்கள், மோதல் மண்டலத்தை ஷெல் தாக்குதல் நடத்தியதாகவும் மற்றும் ஹட்ரூட் அருகே "பெரிய அளவிலான போர் நடவடிக்கைகளில்" ஈடுபட்டதாகவும் அஸெரி படைகள் குற்றம் சாட்டியது. மேலும் முன்னரங்கு பகுதிகளில் ஷெல் தாக்குதல் நடத்தியதாக ஆர்மீனியப் படைகள் அஜர்பைஜானை குற்றம் சாட்டியது.

மாஸ்கோ மற்றும் தெஹ்ரான் இரண்டும் அஜர்பைஜான் மற்றும் ஆர்மீனியாவை போர் நிறுத்தத்திற்கு கட்டுப்படுமாறு பலனில்லாமல் அழைப்பு விடுத்தன. ஈரானிய வெளியுறவு அமைச்சக செய்தித் தொடர்பாளர் சயீத் கதிப்சாதே கூறினார்: "ஈரான் இரு தரப்பினருக்கும் அதிக சுய கட்டுப்பாட்டைக் கடைப்பிடிக்க அழைப்பு விடுக்கிறது, முக்கிய உள்கட்டமைப்பு, நகரங்களின் குடியிருப்புப் பகுதிகள் மற்றும் பொதுமக்கள் கொல்லப்பட்டமை மீதான ஏவுகணை தாக்குதல்களை கண்டிக்கிறது." "நிரந்தர மற்றும் நிலையான அமைதி மற்றும் தீர்வை" அடைவதற்கு பேச்சுவார்த்தைகளை நடத்த ஈரான் முன்வருவதாகவும் காதிப்ஸாதே கூறினார்.

ரஷ்ய வெளியுறவு மந்திரி செர்ஜி லாவ்ரோவ், "ஏற்றுக்கொள்ளப்பட்ட முடிவுகள் இரு தரப்புகளாலும் கடுமையாக பின்பற்றப்படும் என்று நாங்கள் எதிர்பார்க்கிறோம்," என்று அவர் கூறினார், போர் நிறுத்த உடன்படிக்கை எட்டப்பட்ட "இரவு முழுவதும் கண்காணிப்பு" "வீணாகாமல் இருக்காது" என்று அவர் நம்புவதாக மேலும் சேர்த்துக் கொண்டார்.

எவ்வாறாயினும், அஜர்பைஜான் மற்றும் ஆர்மீனியா ஆகிய இரண்டும் போர் நிறுத்தத்தை ஒதுக்கித் தள்ளிவிட்டு, 1991 ல் சோவியத் ஒன்றியத்தை ஸ்ராலினிச அதிகாரத்துவம் கலைத்ததன் பேரழிவு விளைவுகளுடன் பிரிக்கமுடியாத வகையில் பிணைந்திருக்கும் ஒரு மோதலை அதிகரிக்கத் தயாராக உள்ளன.

1921 ஆம் ஆண்டில், சோவியத் ரஷ்யாவின் ஆரம்ப ஆண்டுகளில், நாகோர்னோ-கராபாக் பெரும்பான்மை-ஆர்மீனிய பிராந்தியமாக அஸெரி பகுதிகளால் சூழப்பட்டு இருந்தது. இதற்கு அஜர்பைஜானுக்குள் தன்னாட்சி அந்தஸ்து வழங்கப்பட்டது. எவ்வாறாயினும், சோவியத் ஒன்றியத்தின் கலைப்பு மற்றும் முதலாளித்துவத்தை மீட்டெடுப்பதற்கு முன்னணியில் வழிநடத்திய சோவியத் அதிகாரத்துவத்தில் இன தேசியவாதம் மற்றும் பிரிவினைவாதத்தின் எழுச்சிக்கு மத்தியில் ஆயுத மோதல்கள் வெடித்தன. நாகோர்னோ-கராபாக்கிற்காக அஸெரி மற்றும் ஆர்மீனிய படைகள் சண்டையிட்டன, நாகோர்னோ-கராபாக் அதனுடைய சுதந்திரத்தை அறிவித்தது, இது 1988-94 போருக்கு வழிவகுத்தது, இதில் 30,000 பேர்கள் கொல்லப்பட்டும் மற்றும் 1 மில்லியனுக்கும் அதிகமானோர் இடமும்பெயர்ந்தனர்.

கடந்த மூன்று தசாப்தங்களாக, மோதல் அவ்வப்போது மீண்டும் வெடித்தது, நீடித்த தீர்வுக்கான பேச்சுவார்த்தைக்கான அனைத்து முயற்சிகளையும் மீறி, தேசிய-அரசு அமைப்பின் பிற்போக்குத்தனமான மற்றும் சாத்தியமற்ற தன்மையை அடிக்கோடிட்டுக் காட்டுகிறது. 1994 முதல் ஆர்மீனியப் படைகள் கட்டுப்படுத்தியுள்ள கராபாக்கை துருக்கி-அஸெரி இன (Ethnic-Turkic Azeri) படைகள் திரும்பப் பெற முயன்றன. சோவியத் ஒன்றியம் கலைக்கப்பட்டதிலிருந்து இப்பிராந்தியத்தில் மூன்று தசாப்தங்களாக அமெரிக்கத் தலைமையிலான ஏகாதிபத்தியப் போர்களால் தூண்டப்பட்ட அனைத்து இன மற்றும் இராணுவப் பதட்டங்களால் இந்த மோதல் இப்போது அதிகரிக்கிறது.

காக்கசஸ் பிராந்தியமானது கிழக்கில் கஸ்பியன் கடல் மற்றும் மத்திய ஆசியா, சீனாவிற்கு இடையே; தெற்கில் ஈரான் மற்றும் துருக்கி; மேற்கே கருங்கடல் மற்றும் ஐரோப்பா; மற்றும் வடக்கில் ரஷ்யா அமைந்துள்ளதும் இப்போது வெடிப்புத் தன்மை கொண்டதுமான பூகோள மூலோபாய பதட்டங்களின் மையப் புள்ளியாக இது உள்ளது. இந்த மையப் புள்ளி பிராந்தியத்தில் பல்வேறு போர்களும் பூசல்களும் ஒன்றுசேர்ந்து உருவாகுவதற்கும், பெரும் சக்திகளுக்கு இடையே ஒரு உலகளாவிய போராக விரிவடையும் என்ற உண்மையான ஆபத்தையும் சுட்டிக்காட்டுகிறது.

பெய்ஜிங் தனது "ஒரே இணைப்பு, ஒரே சாலை" (“Belt and Road”) உலகளாவிய உள்கட்டமைப்பு திட்டத்தை உருவாக்கி வருவதால், சீனாவை அச்சுறுத்தும் அமெரிக்கப் போர் உந்துதல் இவைகளில் குறைந்தது அல்ல. அக்டோபர் 1 ஆம் திகதி ஹார்வர்ட் பல்கலைக்கழகமானது “தெற்கு காக்கசஸில் சீன முதலீடு அதிகரித்து வருவதை அமெரிக்கா கண்காணிக்க வேண்டும்” என்ற விளக்கத் தலைப்பில் ஆய்வாளர் டானியல் ஷாபிரோ, இந்த பிராந்தியத்தில் சீனாவின் இருப்பு “ஐக்கிய அமெரிக்காவின் எரிசக்தி பாதுகாப்பு மற்றும் பிற முக்கிய நலன்களை பாதிக்கும்” என்று எழுதினார். சீன நிறுவனங்களைப் பொறுத்தவரை, இப்பிராந்தியம் "காக்கசஸ், ஐரோப்பிய ஒன்றியம் மற்றும் மத்திய ஆசிய சந்தைகளுக்கு விரிவாக்கம் செய்ய ஒரு சிறந்த இடப்பெயர்ச்சி விநியோக மையமாக உள்ளது" என்று அவர் கூறினார்.

"ஐரோப்பாவிலும் ஆசியாவிலும் [இணக்கமான] ஒரு தொடர்ச்சியான அமெரிக்க தலைமை பாத்திரத்துடன் ஒரு சமநிலையை நிலைநாட்டுவது" மற்றும் எண்ணெய் மற்றும் நிதியியல் சந்தைகள் உட்பட "முக்கிய உலக அமைப்புமுறைகளின் ஸ்திரத்தன்மையை" உறுதி செய்வது உட்பட, அப்பிராந்தியத்தில் சீனாவின் நடவடிக்கைகள் "பல அமெரிக்க முக்கிய நலன்களை அச்சுறுத்துகின்றன" என்று ஷபிரோ குற்றஞ்சாட்டினர்.

அடுத்த மாத ஜனாதிபதித் தேர்தலின் முடிவுகளை மதிக்க மாட்டேன் என ஜனாதிபதி டொனால்ட் ட்ரம்ப்பின் அச்சுறுத்தல் தொடர்பாக அமெரிக்க அரசியல் அமைப்புமுறையில் பெருங்குழப்பம் வெடிக்கும் நிலையில், தற்போதைய கராபாக் போர் குறித்து அமெரிக்க அதிகாரிகள் முக்கிய அறிக்கைகளை வெளியிடவில்லை. இருப்பினும், சில பகுப்பாய்வுகளின்படி, அவர்கள் அஜர்பைஜானுக்கு கணிசமான 100 மில்லியன் டாலர்கள் இராணுவ உதவியை வழங்கியுள்ளனர், இது இஸ்ரேல் மற்றும் துருக்கியிலிருந்து பெரிய ஆயுதங்களை வாங்கியது, இது ஆர்மீனியாவுடனான இராணுவ சமநிலையையும் ஓரளவுக்கு மாற்றியமைத்தது. ஆர்மீனியா அதன் பங்கிற்கு ரஷ்ய மற்றும் பிரெஞ்சு ஆதரவை நம்பியுள்ளது.

சிரிய இஸ்லாமிய “கிளர்ச்சி” போராளிகள் மற்றும் துருக்கிய பாதுகாப்பு நிறுவனங்கள் ரஷ்யா மற்றும் ஈரான் எல்லைகளிலுள்ள அஜர்பைஜானுக்கு போராட்டக்காரர்களை அனுப்புகின்றன என்ற அறிக்கைகள் இந்த பதட்டங்களை மேலும் தூண்டுகின்றன. சிரியாவில் ஒரு தசாப்த கால நேட்டோ போரில் இந்த போராளிகளுக்கு எதிராக சிரிய ஜனாதிபதி பஷர் அல்-அசாத்தின் ஆட்சியை ஆதரித்த தெஹ்ரான் மற்றும் மாஸ்கோவானது இந்த போராளிகள் துருக்கிய-தேசியவாத அல்லது இஸ்லாமிய கோரிக்கைகளை ஈரானின் அஸெரி பெரும்பான்மை பிராந்தியங்களில் அல்லது ரஷ்யாவிலுள்ள வடக்கு காக்கசஸ் முஸ்லீம் பிராந்தியங்களில் பரப்பக்கூடும் என்று அஞ்சுகின்றனர்.

ஆர்மீனியாவுக்கு பிரெஞ்சு ஏகாதிபத்தியத்தின் ஆதரவானது துருக்கிய அரசாங்கத்துடனான அதன் பரந்த மோதலின் ஒரு பகுதியாகும், இது லிபிய நாட்டில் 2011 ஆண்டு நேட்டோ போரினால் தூண்டப்பட்ட லிபிய உள்நாட்டுப் போரில் பிரான்சின் பினாமிகளை எதிர்க்கும் குடிப்படைகளை ஆதரித்தது. இது சமீபத்திய ஆண்டுகளில் லிபியாவில் மட்டுமல்லாமல், துருக்கி, கிரீஸ் மற்றும் சைப்ரஸ் ஆகிய நாடுகளும் போட்டி உரிமைகோரல்களைக் கொண்ட மத்தியதரைக் கடலிலுக்கு அடியிலுள்ள எண்ணெய் இருப்பு வளங்கள் மீதான மோதலாக அதிகரித்தன. இதில், துருக்கியுடனான போருக்குத் தயாராவதற்காக சமீபத்தில் பிரெஞ்சு போர் விமானங்கள் மற்றும் இராணுவத் தளபாடங்கள் பில்லியன் கணக்கான யூரோக்களுக்கு வாங்கிய கிரீஸை பிரான்ஸ் தீவிரமாக ஆதரித்துள்ளது.

துருக்கி எண்ணெய் அகழ்வு செய்யும் கப்பலான Oruç Reis ஐ கிரீஸ் உரிமை கோரிய கடலில் எண்ணெய்க்கான ஆராய்ச்சி செய்ய அனுப்புவதாக அறிவித்தபோது, இந்த மோதல் நேற்று மீண்டும் கொழுந்துவிட்டு எரியத் தொடங்கிவிட்டது. இந்தக் கோடையில் துருக்கிய கப்பல்கள் மீது துப்பாக்கிச்சூடு நடத்தும் முனைக்கு நெருங்கி அடிக்கடி வந்துகொண்டிருந்த கிரீஸ் வெளியுறவு அமைச்சகம் இது ஒரு "புதிய தீவிரமான விரிவாக்கம்" என்று அழைத்தது.

முழு பிராந்தியமும் ஒரு வெடிமருந்து கிடங்காக இருக்கிறது, பல்வேறு மோதல்கள் ஒரு பொதுவான பெருந்தீயாக வெடிக்க ஒவ்வொன்றும் அச்சுறுத்துகின்றன, முதலாளித்துவம் மற்றும் ஏகாதிபத்தியத்திற்கு எதிரான ஒரு சர்வதேச போர் எதிர்ப்பு இயக்கத்தில் தொழிலாள வர்க்கத்தை தேசிய எல்லையைக் கடந்து ஐக்கியப்படுத்துவதற்கான அவசர அவசியத்தை அடிக்கோடிட்டுக் காட்டுகிறது.